37 வருடங்களுக்குப் பிறகு ரீமேக் செய்யப்படும் முந்தானை முடிச்சு! கே பாக்யராஜ் இயக்கி, நடித்த முந்தானை முடிச்சு படம் 37 ஆண்டுகளுக்குப் பிறகு ரீமேக் செய்யப்படுகிறது. இதில், சசிகுமார் ஹீரோவாக நடிக்க இருக்கிறார்.
முந்தானை முடிச்சு படம் 37 ஆண்டுகளுக்குப் பிறகு ரீமேக் செய்யப்பட இருக்கிறது.
கடந்த 1983 ஆம் ஆண்டு பாக்யராஜ் இயக்கி, நடித்த படம் முந்தானை முடிச்சு. இந்தப் படத்தில், பாக்யராஜ் உடன் இணைந்து ஊர்வசி, பூர்ணிமா பாக்யராஜ், தீபா, நளினிகாந்த் ஆகியோர் உள்பட பலர் நடித்திருந்தனர்.
ஏவிஎம் நிறுவனம் தயாரித்திருந்த இந்தப் படத்திற்கு இசைஞானி இளையராஜா இசையமைத்திருந்தார். இந்தப் படம் விமர்சன ரீதியாகவும், வசூல் ரீதியாகவும் நல்ல வரவேற்பு பெற்றது.
தமிழில் இப்படத்திற்கு கிடைத்த வரவேற்பைத் தொடர்ந்து, ஹிந்தி, தெலுங்கு மற்றும் கன்னடம் ஆகிய மொழிகளில் ரீமேக் செய்யப்பட்டது.
இந்த நிலையில், கிட்டத்தட்ட படம் வெளியாகி 37 ஆண்டுகள் ஆன நிலையில், இப்படம் ரீமேக் செய்யப்பட இருக்கிறது.
ஆம், இப்படத்தின் ரீமேக் உரிமையை இந்தப் படத்தை தயாரித்த ஏவிஎம் நிறுவனத்திடம் இருந்து ஜேஎஸ்பி சதீஷ் ஸ்டூடியோஸ் நிறுவனம் கைப்பற்றியுள்ளது.
இந்தப் படத்தையும் பாக்யராஜ் தான் இயக்க உள்ளார். இதில், ஹீரோவாக சசிகுமார் நடிக்க இருக்கிறார்.
இப்படத்தில் நடிக்க இருக்கும் மற்ற நடிகர், நடிகைகள் குறித்த தேர்வு கொரோனா லாக்டவுன் முடிந்த பிறகு நடைபெறும் என்று தெரிவிக்கப்பட்டுள்ளது என்பது குறிப்பிடத்தக்கது.
