Wake Up Short Film Trailer; விஜயலட்சுமியின் வேக்கப் குறும்படம் டிரைலர் வெளியீடு! நடிகை விஜயலட்சுமி நடிப்பில் உருவாகி வரும் வேக்கப் குறும்படத்தின் டிரைலர் வெளியாகியுள்ளது.
லாக்டவுன் காலத்தில் உருவாக்கப்பட்ட விஜயலட்சுமியின் வேக்கப் குறும்படத்தின் டிரைலர் தற்போது வெளியிடப்பட்டுள்ளது.
சென்னை 600028 என்ற படத்தின் மூலம் தமிழ் சினிமாவில் அறிமுகமானவர் நடிகை விஜயலட்சுமி. இவர், காதல் கோட்டை, கோகுலத்தில் சீதை, காதல் கவிதை படங்களை இயக்கிய இயக்குநர் அகத்தியனின் மகள் என்பது குறிப்பிடத்தக்கது.
விஜயலட்சுமி, அஞ்சாதே, சரோஜா, பிரியாணி, ஆடாம ஜெயிச்சோமடா, சென்னை 600028 – 2 ஆம் பாகம் ஆகிய படங்களில் நடித்துள்ளார்.
தற்போது கசட தபற படத்தில் நடித்து வருகிறார். கடந்த 2018 ஆம் ஆண்டு விஜய் தொலைக்காட்சியில் ஒளிபரப்பு செய்யப்பட்ட பிக் பாஸ் 2 நிகழ்ச்சியில் கலந்து கொண்டு 3ஆவது இடம் பிடித்தார் என்பது குறிப்பிடத்தக்கது.
இந்த நிலையில், தற்போது கொரோனா லாக்டவுன் காரணமாக வீட்டிலேயே இருக்கும் விஜயலட்சுமி வேக்கப் என்ற குறும்படம் ஒன்றில் நடித்துள்ளார்.
த்ரில்லர் கதையை மையப்படுத்தி இந்த வேக்கப் குறும்படம் முழுக்க முழுக்க ஐபோனை பயன்படுத்தியே உருவாக்கப்பட்டுள்ளது.
விஜயலட்சுமி மற்றும் முகமது பெரோஷ் ஆகியோர் மட்டுமே இந்த குறும்படத்தில் நடித்துள்ளனர்.
தற்போது வேக்கப் Wake Up என்ற குறும்படத்தின் டிரைலர் வெளியாகி சமூக வலைதளங்களில் வைரலாகி வருகிறது.
