அதிமுகவின் பவர் என்ன? தமிழகத்தில் எடப்பாடி தலைமையிலான அதிமுகவின் செல்வாக்கு என்ன? என அறிந்துகொள்ள பாஜக புதிய வியூகம் வகுத்துள்ளது.
இந்தியப் பாராளுமன்ற தேர்தல் விரைவில் வரவுள்ளது. பாஜக மீண்டும் ஆட்சியைத் தக்கவைக்கும் முனைப்பில் உள்ளது. இந்நிலையில், தமிழகத்தில் உள்ளே எப்படி நுழைவது என பாஜக பலவழிகளில் முயன்று வருகின்றது.
தற்போதைய எடப்பாடி அரசு பாஜகவிற்கு சாதகமாக நடந்துகொள்கின்றது. இதனால், அதிமுகவின் செல்வாக்கு நாளுக்குநாள் குறைந்துகொண்டே வருகின்றது. தனிச்சையாக செயல்பட திறனற்ற அரசு என விமர்சனம் எழுந்துள்ளது.
இந்நிலையில் குட்கா ஊழல் விவகாரம் தொடர்பாக அதிமுக அமைச்சர் விஜயபாஸ்கர் மீது சி.பி.ஐ. ரெய்டு நடந்துள்ளது. சி.பி.ஐ. திடீரென சசிகலா பக்கமும் திரும்பியுள்ளது. இதனால் டி.டி.வி.யின் செல்வாக்கும் மக்கள் மத்தியில் குறையும். இதன்மூலம், தமிழக இடைதேர்தல்களில் யாருக்கு மக்கள் ஆதரவு அதிகம் உள்ளது எனத்தெரிந்துவிடும்.
இடைதேர்தலில் திமுகவின் பவர் என்ன? எடப்பாடி பவர் என்ன? தினகரன் நிலை என்ன? என பாஜக அறிந்துகொள்ளும். இது பாஜகவிற்கு பாராளுமன்றத் தேர்தல் வியூகத்தை வகுக்க உதவும்.
திமுகவுடன் கூட்டணிவைக்க பாஜக முயன்று, முடியாமற்போனது. எனவே திமுகவை உடைக்க தென்மாவட்டங்களில் அழகிரியை பயன்படுத்த பாஜக முயல வாய்ப்புண்டு. தொகுதிக்கு 10,000 ஓட்டுகள் பிரிந்தால் கூட திமுகவுக்கு பின்னடைவுதான்.
மேலும், தமிழக நடிகர்களை கட்சியில் இணைத்து எழுச்சியை ஏற்படுத்தவும் பாஜக முயன்று வருகின்றது. பாஜகவின் தூண்டுதலில், ரஜினி கட்சி ஆரம்பிக்க உள்ளார் என விமர்சனங்களை சந்தித்தார்.
மோடி எப்படியாவது மீண்டும் ஆட்சிக்குவர முயல்கின்றார். தமிழகத்தில் காலூன்றினால், தென்னிந்தியாவில் கோலோச்சியதற்கு சமம். அதற்காக தமிழகத்தை பகடைக்காயாக பயன்படுத்துகின்றனர்.
