Dharma Rajya: சியான் விக்ரம் இயக்குநரின் அடுத்த அறிவிப்பு தர்ம ராஜ்ய! மஹாவீர் கர்ணா படத்தின் இயக்குநர் ஆர்.எஸ் விமல் இயக்கத்தில் உருவாக இருக்கும் புதிய படம் குறித்து முக்கியமான அறிவிப்பு வெளியாகியுள்ளது.
ஆர் எஸ் விமல் தர்ம ராஜ்ய என்ற படத்தை இயக்க இருக்கிறார்.
தமிழ் சினிமாவில் மாஸ் ஹீரோக்களில் ஒருவராக இருப்பவர் சியான் விக்ரம். படத்தின் கதைக்கு ஏற்ப தனது உடல் எடையை கூட்டி குறைத்து நடிக்கும் நடிகர்களில் இவரும் ஒருவர். உதாரணமாக ஐ, அந்நியன் ஆகிய படங்களை கூறலாம்.
சியான் விக்ரம் நடிப்பில் கடைசியாக கடாரம் கொண்டான் படம் வெளியானது. இந்தப் படத்தைத் தொடர்ந்து, கோப்ரா, துருவ நட்சத்திரம், மஹாவீர் கரணா, பொன்னியின் செல்வன், சியான்60 ஆகிய படங்கள் அடுத்தடுத்து வெளியாக இருக்கிறது.
இந்த நிலையில், மஹாவீர் கர்ணா படத்தை இயக்கி வரும் இயக்குநர் ஆர்.எஸ். விமல் தனது அடுத்த படம் குறித்து முக்கியமான அறிவிப்பை வெளியிட்டுள்ளார்.
அதில், திருவிதாங்கூர் வரலாற்றை அடிப்படையாகக் கொண்டு தர்ம ராஜ்ய என்ற படத்தை இயக்க இருப்பதாக அறிவித்துள்ளார்.
தமிழ், தெலுங்கு, மலையாளம் மற்றும் ஹிந்தி ஆகிய மொழிகளில் இந்த தர்ம ராஜ்ய படம் உருவாக இருக்கிறது.
வரலாற்றை அடிப்படையாகக் கொண்டு உருவாகும் இந்தப் படத்தில் மலையாள சூப்பர் ஸ்டார் ஹீரோவாக நடிக்க வாய்ப்பிருப்பதாக கூறப்படுகிறது.
மேலும், அனைத்து மொழி நடிகர்கள், நடிகைகளும் இந்தப் படத்தில் நடிக்க இருக்கின்றனர்.
படம் முழுவதும் விஆர் தொழில்நுட்பத்தை கொண்டு லண்டனில் உருவாக்கப்பட இருக்கிறது. கொரோனா முற்றிலும் சரியான பிறகு இந்த ஆண்டு இந்தப் படத்தின் படப்பிடிப்பு தொடங்கப்பட இருக்கிறது.
மணிரத்னம் இயக்கத்தில் உருவாகி வரும் பொன்னியின் செல்வன் படத்தின் படப்பிடிப்பு முடிந்த பிறகு மஹாவீர் கர்ணா படத்தின் படப்பிடிப்பு தொடங்கப்படும் என்று எதிர்பார்க்கப்படுகிறது.
