Citizen Movie; அத்திபட்டிக்காக பல கெட்டப் போட்ட தல அஜித்: சிட்டிசன் வெளியாகி 19 வருடமாச்சு! தல அஜித் நடித்த சிட்டிசன் படம் வெளியாகி இன்றுடன் 19 ஆண்டுகளை கடந்துவிட்டது.
சிட்டிசன் படம் திரைக்கு வந்து 19 வருடங்கள் ஆகிவிட்டது.
இயக்குநர் சரவண சுப்பையா இயக்கத்தில் தல அஜித் – அறிவானந்தம், அந்தோனி, அப்துல்லா மற்றும் சுப்பிரமணி ஆகிய கதாபாத்திரங்களில் நடித்து கடந்த 2001 ஆம் ஆண்டு ஜூன் 8 ஆம் தேதி வெளியான படம் சிட்டிசன்.
அரசியல்வாதிகளால் அப்பா, அம்மா உள்பட அத்திபட்டி என்ற தனது கிராமத்தையே இழந்து வாடிய சிறுவன் வளர்ந்து பெரியவனாக வந்த பிறகு அந்த அரசியல்வாதிகளை கடத்தி, அவர்களை சட்டத்திற்கு முன்பு நிறுத்தி அவர்களுக்கு தண்டனை பெற்றுத்தருவதே இப்படம்.
இந்தப் படத்தில், மீனா, வசுந்தரா தாஸ், நக்மா, நிழல்கள் ரவி, பாண்டியன், வினு சக்ரவர்த்தி ஆகியோர் உள்பட பலர் நடித்திருந்தனர்.
மோட்டார் சைக்கிள் ஒர்க்ஷாப் நடத்தி வரும் அஜித், ஒவ்வொரு முறையும், விதவிதமான கெட்டப் போட்டுக்கொண்டு தனது அத்திபட்டி கிராமத்தையே காணாமல் போகச் செய்த நீதிபதி வேதாச்சலம், ஆட்சியர் சந்தானம், டிஜிபி தேவசகாயம் ஆகியோரை கடத்தும் காட்சிகளும், அதன் பிறகு சிட்டிசன் என்று அஜித் விட்டுச்செல்லும் குழுவும் சரி, படத்தில் காண்போரை மெய்சிலிரிக்க வைத்த காட்சிகள்.
சிபிஐ அதிகாரியாக நடித்துள்ள நக்மா (சரோஜினி ஹரிச்சந்திரன்) படத்திற்கு பக்கபலமாகவே அமைந்துள்ளார். கடத்தப்பட்டவர்களையும், காணாமல் போன அத்திபட்டி கிராமத்தையும் கண்டுபிடிக்கும் நக்மாவின் காட்சிகள் சூப்பர்.
அஜித்திற்கு திருப்புமுனையை ஏற்படுத்திய படங்களில் சிட்டிசன் படமும் ஒன்று. 100 நாட்களுக்கும் மேலாக ஓடி பாக்ஸ் ஆபிஸ் ஹிட் கொடுத்துள்ளது. சிட்டிசன் படம் தெலுங்கிலும் டப் செய்யப்பட்டு வெளியானது.
இந்த நிலையில், சிட்டிசன் படம் திரைக்கு வந்து இன்றுடன் 19 ஆண்டுகளை கடந்துவிட்டது. இதன் காரணமாக டுவிட்டரில், #19YrsOfGOATCitizen என்ற ஹேஷ்டேக் டிரெண்டாகி வருகிறது.
இந்தப் படத்தின் மூலமாக அத்திபட்டி என்ற கிராமமும் அதிகளவில் பேசப்பட்டது என்பது குறிப்பிடத்தக்கது.
தற்போது தல அஜித் இயக்குநர் ஹெச் வினோத் மற்றும் தயாரிப்பாளர் போனி கபூர் கூட்டணியில் வலிமை படத்தில் நடித்து வருகிறார். கொரோனா லாக்டவுன் காரணமாக படப்பிடிப்பு நிறுத்தி வைக்கப்பட்டுள்ளது.
