Producer R Ragunathan Passed Away; கமலை அறிமுகம் செய்த தயாரிப்பாளர் மரணம்: சோகத்தில் திரையுலகம்! கமல் ஹாசனை பட்டாம்பூச்சி என்ற படத்தின் மூலம் ஹீரோவாக்கிய தயாரிப்பாளர் ரகுநாதன் காலமானார்.
தயாரிப்பாளர் ரகுநாதன் காலமானார்.
அண்மை காலமாக தமிழ் சினிமாவில் அடுத்தடுத்து சோக சம்பவங்கள் நடந்து கொண்டிருக்கிறது. கடந்த மார்ச் மாதம் இயக்குநர் விசு, நடிகர் சேதுராமன், பரவை முனியம்மா ஆகியோர் அடுத்தடுத்து மரணமடைந்தனர்.
இந்த மாதம் இளையராஜாவின் ஆஸ்தான ட்ரம்ஸ் இசைக்கலைஞர் புருஷோத்தமனும் காலமானார். இந்த நிலையில், தற்போது தமிழ் சினிமாவின் பழம் பெரும் இயக்குநர் மற்றும் தயாரிப்பாளரான ரகுநாதன் வயது முதிர்வு காரணமாக மரணமடைந்துள்ளார்.
இவர், குழந்தை நட்சத்திரமாக நடித்து வந்த கமல் ஹாசனை ஹீரோவாக்கியவர். ஆம், பட்டாம்பூச்சி என்ற படத்தின் மூலம் கமல் ஹாசனை ஹீரோவாக்கியவர் தயாரிப்பாளர் ரகுநாதன்.
மேலும், தனது தயாரிப்பு நிறுவனம் மூலம் வரப்பிரசாதம், நீ வாழ வேண்டும், அக்னிப்பிரவேசம், ராஜ ராஜேஸ்வரி போன்ற பல படங்களை தயாரித்துள்ளார்.
இவரது தயாரிப்பில் உருவான மரகதக்காடு என்ற படம் ரிலீஸுக்கு தயாராகியுள்ளது. தயாரிப்பாளரைத்த் தொடர்ந்து இயக்குநராகவும் பிரபு, சுரேஷ், பாண்டியன் ஆகியோரை வைத்து பல படங்களை இயக்கியுள்ளார்.
கடந்த 1975 ஆம் ஆண்டு தொடங்கி இன்று வரை தமிழ் சினிமாவில் புகழ்பெற்ற தயாரிப்பாளராகவும், இயக்குநராகவும் திகழ்ந்த ரகுநாதன் மரணமடைந்த செய்தி திரையுலகத்தினரை சோகத்தில் ஆழ்த்தியுள்ளது.
கமல் ஹாசன் உள்பட சினிமா பிரபலங்கள் பலரும் ரகுநாதன் மறைவுக்கு இரங்கல் தெரிவித்து வருகின்றனர்.
