Chiyaan60; சியான்60 அதிகாரப்பூர்வ அறிவிப்பு வெளியிட்ட இயக்குநர்! தனுஷ் நடிப்பில் உருவாகியுள்ள ஜகமே தந்திரம் படத்தைத் தொடர்ந்து இயக்குநர் கார்த்திக் சுப்புராஜ் சியான்60 படத்தை இயக்க இருப்பதாக அதிகாரப்பூர்வ அறிவிப்பு வெளியிட்டுள்ளார்.
சியான்60 படத்தை இயக்குநர் கார்த்திக் சுப்புராஜ் இயக்க உள்ளார்.
பீட்சா படத்தின் மூலம் இயக்குநராக அவதாரம் எடுத்தவர் இயக்குநர் கார்த்திக் சுப்புராஜ். இப்படத்தைத் தொடர்ந்து, ஜிகர்தண்டா, இறைவி, மெர்குறி ஆகிய படங்களை இயக்கியிருந்தார்.
கடைசியாக இவரது இயக்கத்தில் சூப்பர் ஸ்டார் ரஜினிகாந்த் நடித்த பேட்ட படம் வெளியானது. ரசிகர்களிடையே நல்ல வரவேற்பு பெற்ற பேட்ட படம் வசூல் ரீதியாகவும், விமர்சனம் ரீதியாகவும் நல்ல வரவேற்பு பெற்றது.
இப்படத்திற்கு கிடைத்த அமோக வரவேற்பைத் தொடர்ந்து ரஜினிகாந்தின் மருமகனான தனுஷை வைத்து ஜகமே தந்திரம் படத்தை இயக்கியுள்ளார். இந்தப் படம் விரைவில் வெளியாக இருக்கிறது.
இந்த நிலையில், இப்படத்தைத் தொடர்ந்து இயக்குநர் கார்த்திக் சுப்புராஜ் இயக்கும் புதிய படம் குறித்து முக்கியமான அறிவிப்பு வெளியாகியுள்ளது.
அதன்படி, சியான் விக்ரம் நடிக்கும் 60 ஆவது படமான சியான்60 படத்தை இயக்க இருப்பதாக அதிகாரப்பூர்வமாக அறிவிப்பு வெளியிட்டுள்ளார்.
மேலும், இந்தப் படத்தின் மூலம் முதன் முறையாக சியான் விக்ரமுடன் இணைந்துள்ளார். சியான்60 படத்தில் விக்ரமுடன் இணைந்து அவரது மகன் துருவ் விக்ரமும் நடிக்க இருக்கிறார். அனிருத் இந்தப் படத்திற்கு இசையமைக்க இருக்கிறார்.
7 ஸ்கிரீன் ஸ்டூடியோஸ் நிறுவனம் சார்பில் லலித் குமார் இந்தப் படத்தை தயாரிக்கிறார். தற்போது சியான் விக்ரம் நடிப்பில் கோப்ரா படம் உருவாகி வருகிறது.
விரைவில், இந்தப் படத்தின் படப்பிடிப்பும் முடிக்கப்பட இருக்கிறது. இந்தப் படத்தைத் தொடர்ந்து சியான்60 படத்தில் விக்ரம் நடிப்பார் என்று கூறப்படுகிறது.
விக்ரம் நடிப்பில் உருவாக்கப்பட்டுள்ள துருவ நட்சத்திரம் இன்னும் வெளியாகவில்லை. மகாவீர் கர்ணா, பொன்னியின் செல்வன் ஆகிய இரு படங்களிலும் விக்ரம் நடித்து வருகிறார் என்பது குறிப்பிடத்தக்கது.
