Master மாஸ்டர் படத்தின் படப்பிடிப்பு தற்போது வெற்றிகரமாக நிறைவு பெற்றதைத் தொடர்ந்து படக்குழுவினர் ஒன்றாக இணைந்து புகைப்படம் எடுத்துக்கொண்டனர். மாஸ்டர் படத்தில் விஜய் கல்லூரி பேராசிரியராக நடித்து வருகிறார் என்று தெரிகிறது.
பிகில் படத்தைத் தொடர்ந்து விஜய் நடித்து வரும் படம் மாஸ்டர். கார்த்தியின் கைதி படத்தை இயக்கிய லோகேஷ் கனகராஜ் இந்தப் படத்தை இயக்கியுள்ளார்.
விஜய்யின் உறவினரான சேவியர் பிரிட்டோவின் எக்ஸ்பி கிரியேட்டர்ஸ் நிறுவனம் மாஸ்டர் படத்தை தயாரித்துள்ளது. அனிருத் இந்தப் படத்திற்கு இசையமைத்துள்ளார்.
சமீபத்தில் இந்தப் படத்தின் குட்டி ஸ்டோரி லிரிக் வீடியோ வெளியாகி உலகம் முழுவதும் வைரலானது. மாஸ்டர் படத்தில் விஜய்க்கு ஜோடியாக மாளவிகா மோகனன் நடித்துள்ளார்.
இதற்கு முன்னதாக ரஜினியின் பேட்ட படத்தில் சசிகுமாருக்கு மனைவியாக நடித்திருந்தார். இதே போன்று, இந்தப் படத்தில் ரஜினிக்கு வில்லனாக நடித்த விஜய் சேதுபதி, மாஸ்டர் படத்திலும் விஜய்க்கு வில்லனாகவும் நடித்துள்ளார்.
மேலும், சாந்தனு, ஆண்ட்ரியா, நாசர், ஸ்ரீமன், ரமேஷ் திலக், சுனில் ரெட்டி, ரம்யா சுப்பிரமணியன் ஆகியோர் உள்பட ஏராளமான நட்சத்திர பிரபலங்கள் இந்தப் படத்தில் நடித்துள்ளனர்.
விஜய் கல்லூரி பேராசிரியராகவும், மாளவிகா மோகனன் கல்லூரி மாணவியாகவும் நடித்துள்ளதாக கூறப்படுகிறது. வரும் ஏப்ரல் 9 ஆம் தேதி தமிழ் புத்தாண்டு தினத்தை முன்னிட்டு இந்தப்படம் திரைக்கு வருகிறது.
இந்த நிலையில், ஏற்கனவே இப்படம் இன்னும் 48 மணிநேரத்தில் முடிக்கப்படும் என்று லோகேஷ் கனகராஜ் அறிவிப்பு வெளியிட்டிருந்தார். அதன்படி, தற்போது மாஸ்டர் படத்தின் படப்பிடிப்பு முடிக்கப்பட்டுள்ளது.
இதையடுத்து, படக்குழுவினர் ஒன்றாக இணைந்து புகைப்படம் எடுத்துக்கொண்டுள்ளனர். இதில், லோகேஷ் கனகராஜ், ஸ்ரீமன், பிரேம், கௌரி கிஷான், ஸ்டண்ட் சில்வா மாஸ்டர், ஸ்ரீநாத், சாந்தனு ஆகியோர் இடம்பெற்றுள்ளனர்.
மாஸ்டர் படப்பிடிப்பு முடிக்கப்பட்டதைத் தொடர்ந்து படத்தின் போஸ்ட் புரோடக்ஷன் பணிகள் விறுவிறுப்பாக தொடங்கப்படும் என்று எதிர்பார்க்கப்படுகிறது.
இதற்கிடையில், குட்டி ஸ்டோரி சிங்கிள் டிராக்கை தொடர்ந்து, இரண்டாவது சிங்கிள் டிராக் விரைவில் வெளிவரும் என்று அதிகாரப்பூர்வமாக நேற்று அறிவிக்கப்பட்டது என்பது குறிப்பிடத்தக்கது.
அண்மையில், ஒரு நிகழ்ச்சியில் கலந்து கொண்ட லோகேஷ் கனகராஜ் படத்தில் விஜய் மற்றும் விஜய் சேதுபதி வரும் காட்சிகள் அப்படியே நெருப்பாக இருக்கும் என்று குறிப்பிட்டுள்ளார். இதைக்கேட்ட விஜய் ரசிகர்கள் உற்சாகத்தில் துள்ளிக்குதித்து ஆரவாரம் செய்துள்ளனர். வி
ஜய் படத்தைத் தொடர்ந்து இயக்குநர் லோகேஷ் கனகராஜ் ரஜினிகாந்த் நடிக்கும் தலைவர்169 என்ற படத்தை இயக்க இருக்கிறார். வரும் மார்ச் முதல் வாரத்தில் அதுவும் 5 ஆம் தேதி தலைவர்169 படத்தின் பூஜை நடக்க இருப்பதாக தகவல் வெளியாகியுள்ளது.
இதே போன்று விஜய்யும் தனது 65 ஆவது படத்தில் சுதா கொங்கராவுடன் இணைந்துள்ளதாக கூறப்படுகிறது. மாஸ்டர் படம் வெளியான பிறகு இப்படத்தின் படப்பிடிப்பு தொடங்கப்படும் என்று எதிர்பார்க்கப்படுகிறது.
