Visu Died; அவர் ஒரு குடும்ப கதாநாயகன்: விசு உடலுக்கு எஸ்வி சேகர் அஞ்சலி! உடல்நலக் குறைவால் விசு நேற்று மாலை உயிரிழந்தார்.

இதையடுத்து, அவரது உடலுக்கு நடிகர் எஸ்வி சேகர் மற்றும் ஒய்.ஜி.மகேந்திரன் ஆகியோர் நேரில் சென்று அஞ்சலி செலுத்தியுள்ளனர்.

விசு மறைவு

குடும்ப கதைகளை மையப்படுத்தி ஏராளமான படங்களை கொடுத்தவர் நடிகர் விசு. பிரிந்திருந்த தம்பதியினர் விசுவின் படங்களை பார்த்தாலே ஒன்று சேர்ந்துவிடுவார்கள்.

அந்தளவிற்கு கூட்டுக் குடும்பம், கணவன் – மனைவி, அண்ணன், தம்பி, அப்பா – அம்மா உறவு என்று குடும்ப கதைகளையே விசு கொடுத்துள்ளார். அது போன்ற படங்களில் நடிக்கவும் செய்துள்ளார்.

இந்த நிலையில், சிறுநீரகக் கோளாறு மற்றும் உடல்நலக் குறைவு காரணமாக சிகிச்சை பெற்று வந்த விசு, சிகிச்சை பலனின்றி நேற்று மாலை உயிரிழந்தார்.

விசுவின் மறைவு தமிழ் சினிமாவை அதிர்ச்சிக்குள்ளாக்கியுள்ளது. ஏற்கனவே கொரோனா வைரஸ் உலகத்தை ஆட்டி வைக்கும் நிலையில், விசுவின் மறைவு ஒட்டுமொத்த தமிழ் சினிமாவிற்கும் பேரிழப்பாக அமைந்துள்ளது.

விசு மறைவு செய்தி அறிந்த நடிகர் எஸ்வி சேகர் மற்றும் ஒய்ஜி மகேந்திரன் ஆகியோர் நேரில் சென்று அஞ்சலி செலுத்தியுள்ளனர்.

அப்போது பேசிய எஸ்வி சேகர் கூறுகையில், நானும், விசுவும் 50 ஆண்டுகால நண்பர்கள். வாடா, போடா என்று பேசும் அளவிற்கு நண்பர்களாக இருந்தோம்.

அவர் இயக்கிய முதல் படத்தில் நான் தான் ஹீரோ. அதே போன்று விசு முதன் முதலில் நடித்த படத்தில் நான் தான் ஹீரோ. ஒரு இயக்குனரோடு இணைந்து அதிக படங்களில் நடித்துள்ளேன் என்றால் அது விசுவின் படங்கள்தான்.

வாரத்திற்கு ஒரு முறை, இரண்டு முறை இருந்த டயாலிஸிஸ் அதன் பிறகு தினமும் டயாலிஸிஸ் செய்ய வேண்டியதாயிற்று.

சினிமா இருக்கும் வரை விசுவின் எழுத்துக்களும், விசுவும் சாகமாட்டார். அவரது ஆத்மா சாந்தியடை வேண்டும் என்று இறைவனை பிரார்த்திக்கிறேன் என்றார்.

எஸ்வி சேகர்

என் அருமை 50 ஆண்டுகால நண்பன் நாடக திரைப்பட கதை வசனகர்தா இயக்குனர் விசு சற்றுமுன் நம்மை விட்டு பிரிந்து விட்டார்.  A GREAT LOSS.

இதையடுத்து, ஒய்ஜி மகேந்திரன் பேசினார் என்பது குறிப்பிடத்தக்கது. இவர்களைத் தொடர்ந்து சினிமா பிரபலங்கள் பலரும் டுவிட்டரில் இரங்கல் செய்தி வெளியிட்டுள்ளனர்.

ரஜினிகாந்த்

என் அன்பிற்கும் மரியாதைக்கும் உரிய நண்பர், ஒப்பற்ற எழுத்தாளர், இயக்குனர், நடிகர் விசு அவர்களின் மறைவு என் மனதை மிகவும் பாதித்துள்ளது.

அவரை இழந்து வருந்தும் குடும்பத்தினர், நண்பர்கள் மற்றும் ரசிகர்களுக்கு என் ஆழ்ந்த இரங்கல்களைத் தெரிவித்துக் கொள்கிறேன்.

விக்னேஷ் சிவன்

ஆளுமை நம்மை விட்டு சென்றுவிட்டார். அற்புதமான எழுத்தாளர், இயக்குநர், தனித்துவமான ஒரு நடிகர், தனது சென்டிமெண்ட் மற்றும் காமெடியான வசனங்கள் மூலம் குடும்பங்களை தொட்டவர், இன்றும் இவரது படங்கள் பேசும்.

விசு சாரின் குடும்பத்தினருக்கும் நண்பர்களுக்கும் ஆழ்ந்த அனுதாபங்கள்.

‘அரட்டை அரங்கம்’, ‘தில்லு முல்லு’, ‘சம்சாரம் அது மின்சாரம்’, ‘சிதம்பர ரகசியம்’, ‘பெண்மணி அவள் கண்மணி’, ‘திருமதி ஒரு வெகுமதி’, ‘வரவு நல்ல உறவு’, ‘மணல் கயிறு’ உள்ளிட்ட பல முக்கிய படங்கள் என்றென்றும் வாழும். உங்களை மறக்க முடியாது சார்” என்று பதிவிட்டுள்ளார்.

முக ஸ்டாலின்

இயக்குநர் விசுவின் மறைவால் வாடும் அவரது குடும்பத்தினருக்கும் திரைத்துறையினருக்கும் எனது ஆழ்ந்த ஆறுதலையும், அனுதாபத்தையும் தெரிவித்துக் கொள்கிறேன் என்று திமுக தலைவர் முக ஸ்டாலின் இரங்கல் செய்தி வெளியிட்டுள்ளார்.

சென்னை, துரைப்பாக்கத்தில் உள்ள ஒக்கியம் பகுதியில் மாதா கோயில் தெருவில் உள்ள பிரபஞ்ச அபார்ட்மெண்டில் உள்ள விசுவின் இல்லத்தில் அவரது உடல் அஞ்சலிக்கு வைக்கப்பட்டுள்ளது.

சினிமா பிரபலங்கள் பலரும் விசுவின் உடலுக்கு நேரில் சென்று அஞ்சலி செலுத்தி வருகின்றனர்.

Visu; பிரிந்த குடும்பத்தை ஒன்று சேர்த்த விசுவின் உயிர் பிரிந்தது! நடிகர் விசு உடல்நலக் குறைவு காரணமாக சிகிச்சை பெற்று வந்து நிலையில், சிகிச்சை பலனின்றி இன்று மாலை காலமானார்.

தமிழ் சினிமாவில் தனக்கென்று தனி அடையாளத்தை வகுத்துக் கொண்டவர் மீனாட்சிசுந்தரம் ராமசாமி விஸ்வநாதன் விசு. கடந்த 1941 ஆம் ஆண்டு பிறந்தார்.

திரைப்படத்தில் நடிப்பதற்கு முன்னதாக, மேடை நாடகங்களிலும், தொலைக்காட்சியிலும் நடித்துள்ளார்.

சினிமாவிற்கு வருவதற்கு முன்னதாக இயக்குநர் சிகரம் கே பாலசந்தரிடம் உதவி இயக்குநராக பணியாற்றி அதன் பிறகு இயக்குநராக அவதாரம் எடுத்தார்.

இவரது இயக்கத்தில் வந்த படங்கள் பெரும்பாலும், சமூக, குடும்பக்கதையை மையப்படுத்தியே திரைக்கு வந்தது குறிப்பிடத்தக்கது. பிரிந்த குடும்பத்தை ஒன்று சேர்த்து வைப்பதில், இவரை மிஞ்ச யாருமில்லை.

சன் தொலைக்காட்சியில் விசு அரங்கேற்றிய அரட்டை அரங்கம் நிகழ்ச்சிக்கு தனி ரசிகர்களே உண்டு. இதிலிருந்து விலகிய விசு ஜெயா தொலைக்காட்சியில் மக்கள் அரங்கம் என்ற நிகழ்ச்சியை அரங்கேற்றினார்.

குடும்பம் ஒரு கதம்பம் என்ற படத்தின் மூலம் தமிழ் சினிமாவில் நடிகராக அறிமுகமானார். இதே போன்று கண்மணி பூங்கா என்ற படத்தின் மூலம் இயக்குநரானார்.

1977 ஆம் ஆண்டு முதல் சினிமாவில் கால்பதித்து வந்தார். விசு, தமிழ் சினிமாவில் இயக்குநர், தயாரிப்பாளர், கதாசிரியர், வசனகர்த்தா மற்றும் நடிகர் என்று பல திறமைகளை கொண்டவராக திகழ்ந்துள்ளார்.

தில்லு முல்லு படம் முதல் நல்லவனுக்கு நல்லவன், அவள் சுமங்கலிதான், கெட்டி மேளம், சிதம்பர ரகசியம், வனஜா கிரிஜா, எல்லாம் அவன் செயல், மணல் கயிறு 2 வரை ஏராளமான படங்களில் நடித்துள்ளார்.

விசு இயக்கத்தில் வந்த சம்சாரம் அது மின்சாரம் படம் பல மொழிகளிலும் ரீமேக் செய்யப்பட்டது. இப்படத்திற்கு பிலிம் பேர் விருது கிடைத்தது.

விசுவிற்கு சுந்தரி என்ற மனைவியும், லாவண்யா, சங்கீதா, கல்பனா ஆகிய 3 மகள்களும் இருக்கின்றனர். மூவருக்கும் திருமணம் நடத்தி வைத்துள்ளார்.

மேலும், விசுவிற்கு கிஷ்மு, ராஜாமணி மற்றும் குரியகோஸ் ஆகிய சகோதரர்கள் இருக்கின்றனர். மூவரும் சினிமா துறையைச் சேர்ந்தவர்கள் என்பது குறிப்பிடத்தக்கது.
கடந்த மாதம், ரஜினிகாந்த் நடிப்பில் வந்த நெற்றிக்கண் படத்தை தனுஷ் ரீமேக் செய்ய இருப்பதாக தகவல் வந்தது.

அப்போது இது குறித்து பேசிய விசு, இந்த தகவல் பொய்யாக இருந்தால் பிரச்சனை இல்லை. ஒருவேலை உண்மையாக இருந்தால், இந்தப் படத்தின் கதாசிரியரான என்னிடம் ரீமேக் உரிமையை பெற்ற பிறகே நெற்றிக்கண் படத்தை எடுக்க முடியும்.

அப்படியில்லை என்றால், தனுஷ் மீது வழக்கு தொடரப்படும் என்று ஆவேசமாக கூறியிருந்தார் என்பது குறிப்பிடத்தக்கது.

இந்த நிலையில், உடல்நிலை கோளாறு காரணமாக சென்னையில் உள்ள தனியார் மருத்துவமனை ஒன்றில் சிகிச்சை பெற்று வந்துள்ளார். ஆனால், சிறுநீரக செயலிழப்பு காரணமாக இன்று மாலை விசு உயிரிழந்தார். அவருக்கு வயது 74.

விசு உயிரிழந்த செய்தி சினிமா வட்டாரத்தில் பெரும் அதிர்ச்சியை ஏற்படுத்தியுள்ளது. சினிமா பிரபலங்கள் பலரும் விசுவின் மறைவிற்கு இரங்கல் தெரிவித்து வருகின்றனர்.

ரசிகர்கள் அஞ்சலி செலுத்தும் வகையில், துரைப்பாக்கத்தில் உள்ள அவரது இல்லத்தில் விசுவின் உடல் பார்வைக்கு வைக்கப்பட்டுள்ளது என்பது குறிப்பிடத்தக்கது.