புத்தாண்டு தினம்: கொண்டாட்டத்தில் ஈடுபட்ட வாலிபர் ஒருவரை 50-ற்கும் மேற்பட்ட கும்பல் ஒன்று சரமாரியாக வெட்டி படுகொலை செய்துள்ளது.

தேனி மாவட்டம் பெரியகுளம் அருகே உள்ள ஜெயமங்கலம் காந்திநகர் காலணி பகுதியைச் சார்ந்த தமிழ்நாடு அரசு போக்குவரத்து கழகத்தில் நடத்துனராக பணியாற்றி வருபவர் காளிமுத்து.

இவரின் மகன் கார்த்தி (வயது 24) தனது நண்பர்களுடன் புத்தாண்டிற்காக “கேக் வாங்க” தனது இரு சக்கர வாகனத்தில் பெரியகுளத்திற்கு சென்றுள்ளார்.

50 பேர் கொண்ட கும்பல்

மேல்மங்கலம் அம்பலகாரர் சாவடி அருகே வந்த போது அங்கு புத்தாண்டு கொண்டாட்டத்தில் ஈடுபட்டிருந்த சுமார் 50 க்கும் மேற்பட்டோர் பைக்கில் வந்தவர்களை வழிமறித்து கடுமையாக தாக்கி உள்ளார்கள்.

இந்த தாக்குதலில் நிலை குலைந்த கார்த்தி மற்றும் அவரது நண்பர்கள் பைக்கை அங்கேயே விட்டு விட்டு ஓடியுள்ளார்கள்.

தனியாக சிக்கிய கார்த்தி

சிறிது நேரம் கழித்து நண்பர்கள் யாரும் இல்லாமல் கார்த்தி மட்டும் தனியே வந்து தனது பைக்கை எடுக்க முயன்றுள்ளார்.

அப்போது, அங்கே கூடியிருந்தவர்கள் கார்த்தியை அரிவாள் உள்ளிட்ட பயங்கர ஆயுதங்களால் தாக்கியதில் சம்பவ இடத்திலேயே கார்த்தி உயிரிழந்தார்.

சம்பவம் பற்றி அறிந்த ஜெயமங்கலம் காவல்துறையினர், கார்த்தியின் உடலை கைப்பற்றி பெரியகுளம் அரசு தலைமை மருத்துவமனைக்கு உடற்கூராய்வுக்கு அனுப்பி வைத்தனர்.

உறவினர்கள் மறியல்

இக்கொலை சம்பவத்தை தொடர்ந்து கார்த்தியின் உறவினர்கள் குற்றவாளிகள் மீது வழக்கு பதிவு செய்து கைது செய்ய வலியுறுத்தி ஜெயமங்கலம் நான்கு ரோடு மற்றும் பெரியகுளம் அரசு தலைமை மருத்துவமனை முன்பாக சாலை மறியல் செய்தனர்.

மேலும், குற்றவாளிகளை கைது செய்ய வலியுறுத்தி சாலை மறியல் செய்த கார்த்தியின் உறவினர்களிடம் மாவட்ட காவல் கண்காணிப்பாளர் திரு.சாய்சரன் பேச்சுவார்த்தை நடத்தினார்.

இதனைத் தொடர்ந்து விரைவில் குற்றவாளிகள் கைது செய்யப்படலாம் என்ற நம்பிக்கையில் உறவினர்கள் கலைந்து சென்றனர்.

கேட்டுக்கு பூட்டு

முன்னதாக, மறியல் போராட்டத்தில் ஈடுபட்டவர்கள் மருத்துவமனை நுழைவாயில் கேட்டை பூட்டியதால் மருத்துவமனைக்குள் மருத்துவர்கள், நோயாளிகள், மருத்துவமனை பணியாளர்கள் என யாருமே உள்ளே செல்ல முடியாமல் மிகவும் சிரமத்திற்கு உள்ளாகினர்.

புத்தாண்டு தினம் அன்று நடந்த இக்கொலை சம்பவத்தால் பெரியகுளம் பகுதி முழுவதும் பெரும் பரபரப்பு ஏற்பட்டுள்ளது.

தலை தனியாக உடல் தனியாக வீசி 6 வயது சிறுவனை எட்டையபுரத்தைச் சேர்ந்த அருண்குமார் படுகொலை செய்துள்ளார்.

தூத்துக்குடி: எட்டையபுரம் அருகே உள்ள வடக்கு முத்தலாபுரம் கிராமத்தில் வசிப்பவர் ஜெய்சங்கர். இவருடைய மகன் நகுலனை (வயது 6) நேற்று மாலை முதல் காணவில்லை.

சிறுவன் நகுலன் துவக்கப்பள்ளியில் முதலாம் வகுப்பு படித்து வந்துள்ளான். நேற்று வீட்டின் முன்பு விளையாடிய சிறுவனை காணவில்லை.

Promo Video

இதையடுத்து சிறுவனின் பெற்றோர்கள் காவல் நிலையத்திற்கு தகவல் கொடுத்துள்ளனர். போலீசார் வழக்குப்பதிவு செய்து விசாரணை நடத்தினர்.

போலீசார் அப்பகுதியில் உள்ள சிசிடிவி கேமராவை ஆய்வு செய்தனர். அப்போது அருண்குமார் என்பவர் நகுலனை அழைத்துச் சென்ற காட்சி பதிவாகியிருந்தது.

சிறுவன் படுகொலை

உடனே அருண்குமாரை கைது செய்து போலீசார் விசாரணை செய்தனர். சிறுவனை படுகொலை செய்ததை அருண்குமார் ஒப்புக்கொண்டதாக கூறப்படுகிறது.

இன்று காலை சிறுவன் கொலை செய்யப்பட்ட இடத்தைக் காண்பிக்க அருண்குமாரை அழைத்துச் சென்றுள்ளனர் போலீசார்.

சிறுவனை படுகொலை செய்து தலை தனியாக, உடல் தனியாக வேறுவேறு இடங்களில் அருண்குமார் வீசியது தெரியவந்தது.

பெற்றோர் சாலை மறியல்

சிறுவனின் உடலைக் கைபற்றி போலீசார் பிரேதப் பரிசோதனைக்கு அனுப்பி வைத்தனர். ஆனால் பெற்றோரிடம் இத்தகவலை போலீசார் கூறவில்லை எனக் கூறப்படுகிறது.

கொலையாளியை தப்பிக்க வைக்க போலீசார் முயற்சி செய்வதாகவும்; சிறுவன் நகுலனின் உடலை, உடனே காண்பிக்க வேண்டும் எனவும்; பெற்றோரும், பொதுமக்களும் சேர்ந்து சாலை மறியலில் ஈடுபட்டனர்.

போலீசார் சமரசம்

இதையடுத்து சிறுவனின் உடலை போலீசார் காண்பித்து போராட்டத்தைக் கலைத்தனர். இருப்பினும் சிறுவன் எதற்காக கொலை செய்யப்பட்டான் எனத் தெரியவில்லை.

அருண்குமாரிடம் சிறுவனை கொலை செய்த காரணத்தை தெரிந்துகொள்ள தீவிரமாக விசாரணை நடத்தி வருகின்றனர் போலீசார்.

கீர்த்தனா மரணம்: கல்லூரி மாணவி கீர்த்தனா மரணமடைந்ததை அடுத்து அவர் எழுதி வைத்துச் சென்ற உருக்கமான கடிதம் கிடைத்துள்ளது.

சென்னை: திருவெற்றியூரைச் சேர்ந்த சாமுவேல் சென்னை குடிநீர் வாரியத்தில் கிளர்க்காக வேலை பார்த்து வருகிறார்.

இவர் மகள் கீர்த்தனா (18) மணலியில் உள்ள ஒரு தனியார் கல்லூரியில் பி‌எஸ்‌சி. முதலாம் ஆண்டு படித்து வந்தார்.

கதவு மூடப்பட்டது

காலேஜில் தேர்வு எழுதிவிட்டு வீட்டிற்கு வந்த கீர்த்தனா, நேராக தன்னுடைய அறைக்குள் சென்று கதவைச் சாத்திக்கொண்டார்.

நீண்ட நேரமாகியும் மகள் வெளியே வராததால் பெற்றோர்கள் அதிர்ச்சி அடைந்தனர். கதவை நீண்ட நேரம் தட்டியும் மகளிடம் இருந்து எந்த பதிலும் இல்லை.

கீர்த்தனா மரணம்

அதன்பிறகு கதவை உடைத்துக் கொண்டு உள்ளே சென்று பார்த்தனர். மகள் தூக்கில் தொங்கியபடி சடலமாக கிடந்ததைக் கண்டு கதறி அழுதுள்ளனர்.

பெற்றோர்களின் அலறல் சத்தம் கேட்டு அக்கம் பக்கத்தில் உள்ளவர்கள் ஓடி வந்து பார்த்த பின்பு, போலீசாருக்கு தகவல் கொடுத்தனர்.

பிரேத பரிசோதனை

சம்பவ இடத்திற்கு விரைந்து வந்த போலீசார் கீர்த்தனாவின் உடலைக் கைபற்றி பிரேத பரிசோதனைக்கு அனுப்பி வைத்தனர்.

பின்னர் போலீசார், கீர்த்தனாவின் அறையை சோதனை செய்தனர். அப்போது கீர்த்தனா எழுதிய கடிதம் ஒன்று கிடைத்தது.

உருக்கமான கடிதம்

அக்கடிதத்தில் கீர்த்தனா எழுதியதாவது, என் அப்பா-அம்மா மிகவும் கஷ்டப்பட்டு என்னை படிக்க வைக்கின்றனர்.

ஆனால், நான் சரியாகப் படிக்கவில்லை. எனவே, தேர்வில் தோல்வி அடைந்துவிடுவேன். இதனால் நான் தற்கொலை செய்துகொள்கிறேன்.

என் சாவுக்கு யாரும் காரணம் அல்ல என உருக்கமான கடிதம் ஒன்றை எழுதி வைத்துவிட்டு இறந்துள்ளார். இதுகுறித்து போலீசார் வழக்குப் பதிவு செய்து விசாரணை நடத்தி வருகின்றனர்.